४ पौष २०७९, सोमवार
सातपटकका फिफा वर्ष खेलाडी लियोनल मेस्सीले विश्व च्याम्पियन सपना पूरा गरेका छन् । विश्वकप फुटबलको आइतबार राति भएको फाइनलमा साविक विजेता फ्रान्सलाई हराउँदै मेस्सीले विश्वकप उपाधिको सपना पुरा गरेका हुन् ।

सन् २००५ मा सिनियर अन्तर्राष्टिय फुटबलमा डेब्यु गरेका मेस्सीले जित्न बाँकी यहि मात्र एक प्रतियोगिता थियो । क्लब फुटबलका सबै उपाधि जितेपनि राष्टिय टोलीका लागि उपाधि जित्न नसकेको भनेर उनको आलोचना हुँदै आएको थियो । गत वर्ष मात्र उनले सिनियर राष्टिय टोलीका लागि पहिलो उपाधि जितेका थिए कोपा अमेरिकाका रुपमा। ब्रािजलले उसकै मैदानमा हराएर अर्जेन्टिनाले २८ वर्षपछि पहिलो सिनियर अन्तर्राष्टिय उपाधि जितेको थियो ।

मेस्सी अब पेले र म्याराडोनाजस्तै विश्वकप जित्ने खेलाडी बनेका छन् । सन् २०१६ को कोपा अमेरिका फाइनलमा अर्जेन्टिना पराजित भएपछि मेस्सीले आफ्नो भागमा सिनियर अन्तर्राष्टिय उपाधि लेखेको रहेनछ भन्दै सन्याश लिएका थिए ।

तर चौतर्फी दबाबपछि उनी सन्यास फिर्ता लिएर राष्टिय टोलीमा र्फिर्कएका हुन् । मेस्सीकै कप्तानीमा अर्जेन्टिना सन् २०१४ को विश्वकपमा फाइनल पुगेपनि उपाधि भिडन्तमा जर्मनीसँग पराजित भएको थियो । आइतबार सम्पन्न फाइनल खेलको निर्धारित समय २-२ र अतिरिक्त समय ३-३ गोलको बराबरीमा सकिएपछि खेल पेनाल्टी सुटआउटमा पुगेको थियो । पेनाल्टीमा ४-२ को नतिजा निकाल्दै अर्जेन्टिनाले तेस्रो विश्वकप उपाधि जित्यो ।

निर्धारित समयमा खेलको २३औं मिनेटमा मेसीले पेनाल्टी मार्फत गोल गर्दै अर्जेन्टिनालाई अग्रता दिलाएका थिए । खेलको २०औं मिनेटमा फ्रान्सका विङगर ओउस्मान डेम्बेलेले एन्जेल डिमारियालाई बक्स भित्र फाउल गरेपछि अर्जेन्टिनाले पेनाल्टी पाएको थियो । उक्त पेनाल्टीको सदुपयोग गर्दै अर्जेन्टिनाका कप्तानले सुुन्दर गोल गरे ।

डी मारियाले खेलको ३६औं मिनेटमा गोल गर्दै अर्जेन्टिनाको अग्रता दोब्बर पारेका थिए । ९० सेकेन्डमा एम्बाप्पलेले दुई गोल गर्दै फ्रान्सको उपाधि रक्षा यात्रालाई कायम राखे । खेलको ८०औं मिनेटमा एम्बाप्पेले पेनाल्टीमार्फत गोल गर्दै फ्रान्सलाई २-१ को स्थितिमा ल्याएका थिए । ओटा मेन्डि रान्डाल कोलोमुआनीलाई १८ यार्ड बक्सभित्र फाउल गरेपछि फ्रान्सले पेनाल्टी पाएको थियो । उक्त पेनाल्टीलाई सदुपयोग गर्दै एम्बाप्पेले सुन्दर फिनिस गरेका थिए ।

त्यसको एक मिनेट नबित्दै एम्बाप्पलेले बराबरी गोल फर्काएका थिए । उनले मार्को थुरामको पासमा गोल गरेका हुन् । निर्धिरित समयमा थप गोल हुन नसकेपछि खेल अतिरिक्त समयमा धकेलिएको हो । खेलको १०८औं मिनेटमा मेसीले गोल गर्दै पुनः अर्जेन्टिनालाई अग्रता दिलाएका थिए । तर, ११८ औं मिनेटमा ह्याट्रिक पूरा गर्दै एम्बाप्पेले खेललाई ३-३ को स्थितिमा ल्याएका थिए ।

अतिरिक्त समयमा थप गोल हुन नसकेपछि खेल पेनाल्टि सुट आउटमा पुगेको थियो । फ्रान्सका लागि पहिला पेनाल्टी हान्न आएका एम्बाप्पेले गोल गरेपनि ओउरेलिन चुआमेनी र किङग्स्ले कोमानको पेनाल्टी अर्जेन्टिनाका गोलकिपर मार्टिनेजले रोकेका थिए । अर्जेन्टिनाका मेसी, आउलो डिबाला, लेन्ड्रो पारेडेस र गोन्जालो मोन्तेइलले गोल गर्दै उत्कृष्ट जित दिलाए ।

प्रतिक्रिया

सम्बन्धित खवर

ताजा समाचार

लोकप्रिय